Твиттер Facebook жана Instagramдан кийин COVID-19 вакциналары жөнүндө туура эмес маалыматтарды камтыган постторду өчүрө баштайт. Бул тууралуу социалдык тармактын блогунда айтылат.
“Кийинки жумадан баштап, биз эң кооптуу адаштыруучу маалыматтарды алып салууга артыкчылык берип, жакынкы апталарда вакциналар жөнүндө адаштыруучу маалыматтарды камтыган твиттерди белгилей баштайбыз”, - деп билдирди социалдык тармак.
Белгиленгендей, Twitter “эмдөө жана вакцина адамдарга атайылап зыян келтирүү же көзөмөлдөө үчүн колдонулат” деген жалган дооматтарды, эмдөөлөрдүн терс таасирлери жөнүндө жалган жана мурда четке кагылган билдирүүлөрдү, коронавирус жок, ошондуктан эмдөө зарыл эмес деген билдирүүлөрдү алып салат.
Эске салсак, буга чейин Facebook жана Instagram социалдык тармактары колдонуучуларды адаштырган коронавирус жана эмдөө жөнүндө камтылган контентти алып салууну чечишкен.